Grillhytta på Panoramaen
61°07'23,08" N, 5°21'15" Ø
IKKJE SÅ LANGT
Frå Leirvik sentrum til Grillhytta er det 3,5 km. Frå parkering på Øvre Heggebø er det 1,5 km turveg opp til hytta. Denne vegen har fin stigning med slakkare parti som passar dei fleste. Det er godt mogeleg å trille barnevogn opp. Har ein rett sykkel og pågangsmot, vil du også kunne sykle opp.
HYTTEKOS
I Grillhytta finn du ved og grillkol som du kan bruke fritt mot ein Vippsa til Grendalaget. Sjå oppslag i hytta. Grillen skal ikkje sløkkjast med vatn, men om nokon treng vatn, finn ein det i brønnen på sørsida av hytta. Hytta skal alltid forlatast i same orden slik du sjølv ønskjer å finne den. Ta med eige boss og lås hytta når de går.
KVILEBENKAR OG GJESTEBOK
På stader undervegs er det plassert kvilebenkar, slik at du kan ta ein pust i bakken. Oppom Grillhytta er det hengt opp disser for dei små, og det er fine moglegheiter for å henge opp hengekøyer i området. I Grillhytta er det lagt ut gjestebok, og i tillegg kan du registrere turen i UT- appen.
EIT DUGNADSPROSJEKT
Ei trimgruppe frå bygda har teke iniativet til dette prosjektet, og har utført 1261 dugnadstimar. Hyllestad kommune har stått som utbyggjar. Prosjekta er finansiert med spelemidlar, kommunale tilskot og støtte frå Sparebankstiftinga Sogn og Fjordane.
Turvegen og Grillhytta har vorte det mest nytta og mest besøkte turmålet i Hyllestad med eit snitt på 7 personar for dagen sidan Grillhytta vart opna.